Referat soknerådsmøte i Bygland
Tid og stad: Bygland kyrkjekontor, tysdag 28.08.25
Til stades: Susanne Hegenscheidt, Øyvind Aakhus, Liv Sigrun Upsal, Gro Tove Frafjord Sandnes, Kjell Steinbru, Olav Nilsen, Anne Synnøve Ropstad
Opning ved Kjell Steinbru: 1.kor 3.5-9
Sak 18/25 Revidering av avtale mellom Bygland kommune og Bygland kyrkjelege fellesråd - fellesrådssak
VEDTAK:
Vedlagte utkast til ny justert avtale vert lagt til drøfting med Bygland kommune i løpet av hausten 2025, med tanke på ny avtale frå og med 01.01.2026.
Avtroppande og ny kyrkjeverje får fullmakt til å gjennomføra drøftinga.
Endeleg avtaleutkast vert lagt fram i samband med fellesrådets budsjetthandsaming for 2026.
Sak 19/25 Gudstenesteplan 2026 - soknerådssak
VEDTAK:
Saken vert utsett til neste møte, når Kristine Borgen har begynt.
Sak 20/25 Gudstenesteplan hausten 2025 – soknerådssak
VEDTAK
Soknerådet tok gudstenestelista for hausten 2025 til orientering.
Sak 21/25 Status Austad kyrkje Tveit
FRAMLEGG TIL VEDTAK
Bygland kyrkjelege fellesråd tek statusrapporten til orientering, og fremjer på nytt ovanfor kommunen krav om naudsynt løyve til nytt elektrisk anlegg og naudsynt løyve til framtidig drift, slik at Austad kyrkje kan opnast att. Saka vert fremja i samband med budsjetthandsaminga for 2026.
Sak 22/25 Referatsaker
Ingen referatsaker
Ref Anne Synnøve Ropstad
Sak 18/25 Revidering av avtale mellom Bygland kommune og Bygland kyrkjelege fellesråd – fortruleg fellesrådssak
Vedlagt fylgjer utkast til ny avtale.
Hovudinnhaldet i avtalen er:
- Arbeidsyting frå økonomi- og personaletat
- Andre administrative tenester
- Arbeidsyting frå teknisk etat
- Prissetting av arbeidsytingar
- Årleg kommunalt tilskot
Kommentar:
A. Arbeidsyting frå økonomi- og personaletat
Dette punktet er delt i 2:
- Rekneskapsføring
- Lønsutbetalinger
Ein tilrår å vidareføre eiga rekneskapsføring, berekna til ei 10 prosent stilling tilsvarande kr.100.000,-. Dette er ei auke på kr.50.000,- i høve til avtalen som vart gjort i 2012.
Ein meiner kr.100.000,- er meir korrekt, i og med at kommunen i gamal avtale sjølv berekna at dette utgjorde ei 10 prosent stilling.
Avtroppande kyrkjeverje har tilbydd seg å vidareføre rekneskapsføringa på timebasis inntil ny kyrkeverje eventuelt ønskjer å overta.
Rutinar rundt lønsutbetalinger tilrår ein vidareført som før.
Innhaldet i dette er drøfta med kommunens lønsavdeling.
B. Andre administrative tenester
Ein har her lagt inn eit punkt om kontorlokaler, og om bistand knytt til nettverk og felles IT-tenester.
C. Arbeidsyting frå teknisk etat.
I sak 14/25 var det sagt følgjande:
Det er kyrkjeverjas vurdering at det som er sagt om kommunens ansvar for dagleg drift av kyrkjegardane, vedlikehald av kyrkjegardane og kyrkjene, og rådgjevning frå kommunen, i all hovudsak har vore tilfredstillande utført på alle felt.
Ein tilrår difor at pkt.B i all hovudsak vert ståande.
Innhaldet i dette er drøfta med uteavdelinga i Bygland kommune.
Utover dette tilrår ein følgjande tillegg:
Ved ekstraordinære vedlikehaldprosjekt, eller naudsynt utskifting av elektriske anlegg e.l, tek Bygland kommune ansvaret for dette.
D. Prissetting av arbeidsytingar
Ein har her lagt inn nye oppdaterte anslag.
Prissetjinga er drøfta med kommunens økonomisjef
E. Årleg kommunalt tilskot
Ein har her lagt inn forslag om ei dobling av kompensasjon for rekneskapsføring frå kr.50.000,- i 2012 til kr.100.000,- frå og med 2026.
Vidare at årleg tilskot vert justert i høve til årleg berekna løns- og prisstigning, og at det kommunale tilskotet vert utbetalt i byrjinga av kvart budsjettår.
Sak 19/25 Gudstenesteplan 2026 - soknerådssak
Sjølve gudstenesteplanen er i hovudsak fastsett, i samråd med ny sokneprest og organist.
Den sikrar og at organist Eirik Hodnemyr kan spela på dei fleste gudstenestlege samlingane.
Likevel er det slik at det i hovudsak berre vert ein formell gudsteneste i månaden.
Soknerådet bør drøfte korleis ein kan gjennomføra andre typer månadlege samlingar, slik at det framleis vert to gudstenestlege samlingar i månaden.
Sak 20/25 Gudstenesteplan hausten 2025 – soknerådssak
I referatsak 16/25 vart ein del samlingar til hausten sett opp til vidare gjennomgang.
Ein tek her med seg alle som er kjende til no.
Søndag 21.september
Kultur- og songkveld i Bygland kyrkje kl.19.00
Terje Vigen i ord og tonar med Svein Kleivane og Knut Olav Uppstad
Song av Vonheimkoret
Orgelmusikk med Knut Olav Uppstad
Det vert høve til å gje ei gåve til det
kyrkjemusikalske arbeidet
Arrangør: Bygland og Årdal sokneråd
Søndag 5.oktober
17.søndag i treeiningstida
Gudsteneste og avskil med sokneprest Kjell Steinbru
Sandnes kyrkje Åraksbø kl.16.00 ved Kjell Steinbru og Kristine Borgen
Organist: Eirik Hodnemyr
Preiketekst: Markus 5, 35-43 Jesus vekkjer ei lita jente opp frå dei døde
Takkoffer til Vonheim bedehus
Song av Vonheimkoret
Samling og mat i Grendehuset etter gudstenesta
Søndag 19.oktober
19.søndag i treeiningstida
Gudsteneste i Bygland kyrkje kl.11.00 ved Kristine Borgen
Konfirmantpresentasjon
Organist: Eirik Hodnemyr
Preiketekst: Lukas 9, 57-62 Jesus krev alt
Takkoffer til Israelsmisjonen
Søndag 2.november
Minnedag
Minnegudsteneste i Sandnes kyrkje Åraksbø kl.19.30 ved Kristine Borgen
Organist: Eirik Hodnemyr
Preiketekst: Lukas 6,20-23 Sæle og usæle
Takkoffer til Fredheim bedehus
Song av Evje og Hornnes Menighetskor
Kyrkjekaffi
Søndag 16.november
Diakonikveld/konsert/avskils- og velkomstfest
Diakonikveld og konsert i Bygland kyrkje kl.18.00 med Åse Gudrun Thortveit, Charlie Blackwater og Vonheimkoret. Prest: Kjell Steinbru.
Kveldsmat, avskils-og velkomsfest for gamal og ny kyrkjeverje på Vonheim bedehus.
Takkoffer til diakoniarbeidet.
Søndag 30.november.
Ljosmesse i Bygland kyrkje kl.20.00 ved Kristine Borgen.
Organist: Eirik Hodnemyr
Preiketekst: Matteus 21,1-11 Jesus rir inn i Jerusalem
Takkoffer til Søndagsskolen Norge
Musikk av Noregs lengste korps
Søndag 7.desember.
”Lys i mørket”
Jolekonsert i Bygland kyrkje kl.19.00
Sørlandet Pilegrimskor, sopran Annemarie de Jong, pianist Mark van de Veen og fiolinist Robert Cekov
Inngangspris: kr.150,-
Søndag 14.desember. (Denne er usikker på om blir noe av)
Jolekonsert med Kong Hane
Bygland kyrkje kl.18.00
Søndag 21.desember.
Me syng jola inn med Vonheimkoret
Sandnes kyrkje Åraksbø kl.18.00
Boller og kakao blir delt ut når folk kommer. Gro Tove tar ansvar.
Torsdag 24.desember.
Jolaftan
Byglandsheimen kl.13.00
Organist:
Bygland kyrkje kl.14.30
Organist:
Årdal kyrkje Grendi kl.16.00
Organist: Oddbjørn Stakkeland
Jolegudstenester ved Kristine Borgen
Preiketekst: Lukas 2,1-20 Jesus blir fødd
Takkoffer til Kirkens Nødhjelp
Fredag 25.desember
Joledag
Sandnes kyrkje Åraksbø kl.16.00
Gudsteneste ved Kristine Borgen
Organist: Eirik Hodnemyr
Preiketekst: Johannes 1,1-14 Ordet vart menneske
Takkoffer til Kirkens Nødhjelp
Sak 21/25 Status Austad kyrkje Tveit.
Ein syner her til sak 10/24 og sak 15/24 Status og framdrift Austad kyrke Tveit.
Her står det mellom anna:
(Det som er utheva med kursiv gjeld spesifikt Austad kyrkje Tveit
”Rekneskapsoversikten for 2022, 2023 og budsjett 2024 – både på driftsrekneskap og balanserekneskap syner føljande hovudtal:
Denne viser fylgjande resultat:
2022: Underskot på kr.159.754,-
2023: Overskot på kr. 38.196,-
2024: Overskot på kr 82.500;- (Budsjettert)
Disposisjonsfondet (fri egenkapital) har utvikla seg slik:
2021: kr. 398.678,-
2022: kr. 230.513,-
2023: kr. 268.709,-
2024: kr. 350.000,- (Budsjettert)
Oversikten følgjer som eige vedlegg.
Drift, vedlikehald og framtidig status.
Felles for alle kyrkjene er at dei er godt vedlikehalde , både utvendig og innvendig.
Det vert kvart år vedteke ein vedlikehaldsplan, og i all hovudsak har Fellesrådet vore i stand til å fylgja denne og dei prioriteringane som der vert gjort.
Av større vedlikehald i dei siste åra må nemnast innvendig måling og nytt elektrisk anlegg i Sandnes kyrkje Åraksbø. Frå før har det vore utskifting av dei elektriske anlegga i Bygland og Årdal kyrkje. Alle kyrkjebygg har dei siste åra vorte måla utvendig.
Generelt er kyrkjene i svært god stand, då både reisverk, tømmer og kledning på desse gamle kyrkjene er av fyrsteklasses kvalitet.
Det vil likevel bli ei utfordring å halde kyrkjene i like god stand i åra frametter, der prioriteringar òg må gjerast i høve til kor mykje dei framleis vert aktivt nytta i gudstenestelivet. Her må Bygland kommune på banen i endå større grad enn i dag.
Det ordinære tilskotet frå Bygland kommune var uendra med kr.1.217.000,- for rekneskapsåra 2020, 2021, 2022 og 2023. I same periode var det ein løns- og prisvekst på rundt 15 prosent.
I samband med budsjetthandsaminga for 2023, gjorde soknerådet kommunen merksam på dette, og fatta vedtak om at hvis ikkje tilskotet for 2023 vart auka i samsvar med løns- og prisveksten i perioden 2020-2023 måtte ein vurdera å stenga ei av kyrkjene.
Dette vedtaket vart lagt fram for politikarene i samband med kommunens budsjetthandsaming i desember månad 2022.
I etterkant av dette advarte Evje Elektriske, etter ein kontroll av det elektriske anlegget i Austad kyrkje Tveit, mot vidare bruk av det gamle elektriske anlegget, og anbefalte at kyrkja så snart som råd vart stengd for alment bruk.
I første søknerådsmøte i 2023 fatta ein difor eit einstemmig vedtak om å stenga Tveit kyrke inntil vidare, og det vart i samband med dette halde eit folkemøte på Ose Grendehus i mars 2023.
I soknerådsmøtet i januar 2024 vart det så gjort vedtak om å nytta konsulent til ein rapport om tekniske løysningar for eit nytt elektrisk anlegg i Austad kyrkje Tveit, og prisoverslag på dette. Denne rapporten er no klar, og viser ein samla investeringskostnad på rundt kr.770.000,-
Frå 2007 til 2024 er det samla sett brukt kr.4,1 millionar ekslusivt moms til reint vedlikehald av kyrkjene.
Av dette er det brukt i overkant av kr.1,3 millionar til nye elektriske anlegg i Årdal, Bygland og Sandnes kyrke Åraksbø.
Av dette har kommunen finansiert kr.500.000,- , Riksantikvaren kr.320.000,- medan resten er dekt av eigne midler.
Resten av vedlikehaldsmidlene i denne perioden utgjer i overkant av kr.2,7 millionar, eller rundt kr.150.000,- i året til vedlikehald.
Status på vedlikehald er at dette i all hovudsak er svært bra på alle kyrkjebygga, men at ein i framtida ikkje har råd til det same vedlikehaldsprogrammet.
I budsjettåret er avsett kr.100.000,- til vedlikehald, og stort meir kan ein ikkje sjå for seg er mogeleg i åra som kjem heller.
Det betyr at kyrkja ikkje har midler til å vedlikehalda alle kyrkjebygg i same omfang som før.
Bygland kommune har idag 5 kyrkjebygg og 6 kyrkjegardar.
Dette er i høve til folketalet mykje meir enn dei fleste andre kommunar i Noreg”.
I etterkant av sakshandsaminga i soknerådet 08.04.2024 vart det gjort slikt samrøystes vedtak:
Endeleg vedtak om status for Austad kyrkje Tveit vert utsett i påvente av ein tilbodsforespørsel på nytt elektrisk anlegg til fleire leverandørar.
Når desse tilboda føreligg må Bygland kyrkjelege fellesråd sende ein sak til kommunestyret om naudsynt finansiering.
I nytt møte 04.06.2024 gjorde Bygland kyrkjelege fellesråd slikt samrøystes vedtak:
Det vert innhenta tilbod frå 5 leverandørar på nytt elektrisk anlegg i Austad kyrkje Tveit med følgjande alternativ:
- Nytt elektrisk anlegg utan oppvarming
- Nytt elektrisk anlegg med oppvarming i form av benkevarmarar.
Begge alternativ i høve til løysingsforslag frå Evje Elektriske, framlagt som eige vedlegg i sak 15/24.
I tilbodsforespurnaden vert det teke atterhald om naudsynt kommunal finansiering.
Vedtaket om oppvarming i form av benkevarmarar kom etter at varmepumpeleverandøren Ånen Trygsland AS i sin mail av 29.04.2024 frårådde bruk av varmepumper i Austad kyrkje Tveit.
Her skriv han mellom anna:
”Skal man får varmepumpene til å fungere, er man avhengig av å holde en temperatur på minst 10 varmegrader i bygningen gjennom vinteren. Man kan ikke baserer seg på varme opp lokalene fra minusgrader, med varmepumpe, noen får ganger i løpet av vinteren. Det vil ikke fungere om det blir for kaldt.
Jeg anbefaler å ikke montere varmepumper for oppvarming av Austad kyrkje Tveit ut fra en samlet vurdering”.
Tilbodsforespurnad til 5 leverandørar i samråd med vedtaket av 04.06.2024 vart så sendt ut, og i etterkant av tilbodsfristen vart det i Fellesrådssak 20/24 gjort slik samrøysted vedtak:
Tilbodet frå Evje elektriske på kr.692.500,- vert akseptert.
Til frådrag kjem dugnadsinnsats estimert til ein verdi av kr.70.000,-
Nærare detaljar rundt dette vert avklart i eige møte, der og kyrkjeverja deltek.
Saka vert så sendt over til Bygland kommune med søknad om dekning av investeringa, samt ei auke på kr.50.000,- i årleg driftstilskot for å kunne gjenåpne Austad kyrkje Tveit til vanleg drift.
I samband med budsjetthandsaminga for 2025 gjorde fellesrådet i sak 23/24 følgjande samrøystes vedtak:
Vedlagte budsjettframlegg slik det gjeng fram av kolonne ”Budsjett 2025” vert fastsett som fellesrådets budsjett for 2025.
I tillegg søker ein Bygland kommune om eit tilskot til nytt elektrisk anlegg i Austad kyrkje Tveit på netto kr.622.500,- og eit tilskot til reperasjon av taket på Årdal kyrkje Grendi på inntil kr.1 million.
Det er ein føresetnad for gjenåpning av Austad kyrkje Tveit at det kommunale driftstilskotet vert auka med kr.50.000,- i året.
Som kjent har fellesrådet i etterkant fått ei løyving på kr.650.000,- frå Riksantikvaren til eit forprosjekt knytt til reperasjon av taket på Årdal kyrkje Grendi.
Men status for Austad kyrkje Tveit er uendra, bortsett frå at det mellom anna vert arbeidd med planar om å gjera ho om til ei såkalla ”Kulturkyrkje”.
Men dette endrar etter kyrkjeverjas vurdering ingenting i høve til behovet for nytt elektrisk anlegg i Austad kyrke Tveit.
Ein tilrår difor at saka på nytt vert fremja i samband med budsjetthandsaminga for 2026.